Art. 1 La Uniun di Ladins dla Val Badia é n’assoziaziun ch’à por fin i problems y i interèsc di ladins; ara ciara dantadöt de formè na cosciënza ladina, se tol a cör y defënn nosc patrimone linuistich, cultural y folcloristich tignìn cunt dla situaziun soziala y economica.

Art. 2 Fà pert dla Uniun di Ladins dla Val Badia pò düc i ladins, i naturalisà, i ladins de descendënza, ince sc’ai à la residënza fora dla valada, y ince düc chi che s’à fat miric o simpatisëia por la gauja ladina.

Art. 3 La Uniun di Ladins dla Val Badia n’é liada a degun partì politich; ara ô defëne i dërc de mendranza ladina.

Art. 4 La Uniun di Ladins dla Val Badia à la sënta a San Linert de Badia.

Art. 5 A cé dla Uniun di Ladins dla Val Badia él n consëi de 13 mëmbri, danter chisc n presidënt y 12 aconsiadus. Le presidënt vëgn lité dal consëi a maioranza assoluta d’usc. 7 aconsiadus vëgn lità dal’Assemblea Generala a maioranza d’usc.
I aconsiadus lità tla pröma riuniun cooptarà ciamò 6 mëmbri dl consëi tignin cunt dles istituziuns y di paîsc nia rapresentà. I mëmbri cooptà é aconsiadus cun düc i dërc y düc i dovëis.
Le vizepresidënt vëgn lité dal consëi a maioranza assoluta d’usc. Le presidënt nominëia n scrivan y n cassier danter i aconsiadus. In cajo d’oportunité ti pòl gnì surandè les döes inciaries ala medéma porsona.
Danter i aconsiadus pòl gnì metü sö na junta de 5 porsones che surantôl les funziuns delegades dal consëi; de chësta junta fej pert le presidënt y le scrivan. Le consëi romagn impé 3 agn. Le presidënt rapresentëia l’assoziaziun a düc i efec defrunt a terzi.
L’Assemblea Generala da dant les linies generales dl’ativité.
Dô la lîta dl consëi mët l’Assemblea Generala 2 porsones che ciara jö i cunc. Chisc controlëia i cunc y referësc al’Assemblea Generala. Ai romagn ince 3 agn.

Art. 6 La Uniun di Ladins dla Val Badia ciara de menè inant süa ativité cun mesums finanziars che vëgn ite:
a) dales cuotes d’iscriziun
b) da contribuc da pert dl stat, dla regiun, dla provinzia, di comuns y de istituziuns publiches y privates desvalies
c) da spënures y scincundes

Art. 7 I scric ite ala Uniun di Ladins dla Val Badia à chisc dërc:
a) ai tol pert ales manifestaziuns y a dötes les scomenciadìes metüdes a jì dala Uniun.
b) Ai à le dërt atif y passif d’usc
c) Ai pò fà propostes

Art. 8 I scric ite à chisc dovëis:
a) se tignì ales normes dl Statut dla Uniun
b) portè inant les ativitês che vegn metüdes a jì
c) paié vign’ann le contribut d’iscriziun fat fora

Art. 9 Les dezijiuns dl consëi vëgn tutes a maioranza assoluta, cun almanco 7 aconsiadus presënc. In cajo de parité d’usc tira dant la usc dl presidënt.

Art. 10 Le vizepresidënt sostituësc le presidënt, sc’al mancia o sc’al é impedì.

Art. 11 Le scrivan tëgn la corespondënza y scrì i verbai des sentades. Por l’archif y les biblioteches culturales vëgnel metü porsones aposta.

Art. 12 Le cassier tëgn i cunc, documentëia ci che va ite y ci che va fora, paia fora i mandac firmà dal presidënt.

Art. 13 L’Assemblea Generala pò decretè da stlü fora dla Uniun n scrit ite, por gaujes motivades, cun iudiz insindacabl.

Art. 14 N aconsiadù che mancia 3 iadi indolater, nia iustifiché, ales sentades pert le post y vëgn sostituì.

Art. 15 Sön propostes dl consëi pò l’Assemblea nominé mëmbri d’onur.

Art. 16 Mudaziuns ai articui de chësc statut pòl mâ gnì fat, sce 2/3 dl’Assemblea Generala é a öna